אגודת שע"י חברת שומרי שביעית, איז געגרינדעט געווארן בשנת תשס"ז דורך הרב שמחה מרגליות, זיך גרייטענדיג צום בעפארשטייענדן שמיטה-יאהר (שנת תשס"ח). דורכגעלערנענדיג די הלכות און ענינים 'שמיטת קרקעות', האט זיך ארויסגעשטעלט די ווייטאגליכע מציאות, אז היינט צוטאג'ס זענען כמעט נישט פארהאנען יודן וואס זענען ריכטיג מקיים 'מצות שמיטה' און זענען ליידער נישט זוכה צו זיין א טייל פון די 'שומרי שמיטה'.

דערזעהנדיג די פראבלעם, האט אויפגעבליצט דער געדאנק: אויפשטעלן אן אפציעלע ארגענעזאציע וועלכע וועט זיך אפגעבן מזכה צו זיין יעדן איד וואס וויל ריכטיג מקיים זיין 'מצות שמיטה', דורכ'ן קויפן אן אייגענעם שטיק לאנד. כ"ק אדמו"ר בעל עקבי אבירים מסאדיגורה זצוק"ל האט געשטיצט דעם געדאנק און האט געוואנדן הרב מרגליות צום עמוד ההלכה הגאון הגדול רבי שמואל אליעזר שטערן שליט"א גאב"ד שערי הוראה ורב מערב בני ברק וועלכע האט אויסגעקלארט אלע הלכה'דיגע אספעקטן וועלכע האבן זיך געפאדערט, כדי צו ערמעגליכן פאר ערליכע יודן מקיים צו זיין די 'מצות שמיטה' מיט די גרעסטע מאס הידור.

זינט איר גרינדונג, טוט הגרש"א שטרן שליט"א שטיין אין שפיץ פון די ארגענעזאציע און ווערט פאררעכענט אלס דער אפציעלער 'מורה דרך' פון 'אגודת השמיטה'.

ביי די גרינדונג פון 'אגודת השמיטה' האט זיך הגרש"א שטערן שליט"א דורכגערעדט מיט די גדולי הדור הגר"ש וואזנער זצ"ל בעל שבט הלוי, הגרמי"ל לפקוביץ זצ"ל ראש ישיבת פונוביזש, ויבלחט"א מרן שר התורה הגר"ח קנייבסקי שליט"א, וועלכע האבן זיך אלע אויסגעדרוקט מיט גרויס התפעלות אויף די געוואלדיגע זיכוי הרבים און דאס אויפפרישונג פון די היסטארישע מצוה.